أمين رگنون
گلت نكون منام
ف سروية معنادة
گلت نكون زحام
ف زحام وقاتي..
گلت ندير گلب
يبدا
ايلا بغات لقصايد تهدا
مايديه مايجيبو ريح
ما تغرو كبدة
او يزاحمو ف الشون
حرف مشطون
گلت نكون..
گلت نكون شمعة
نبكي ذنبي
نلون دربي
ندهن الليل بنصوعية الذات
نرهن للضو قنيت فين يبات
نواعد ف كل دبيلة
صبر الحسكة
نعاود كل ليلة
قصة البكا
و نعاود نزهر
مع كل رمشة غافية
کل رعشة دافية
کل فراشة طافية
الضلام ف احضان العافية
تفدي بالرووح
شباب الضو المسجون
گلت نكون..
گلت نكون
ضلمة باهتة
هشييييييشة..
تغزل مجدوول الليل
ب ريشة ..
تهرس ف الكاس گمرة
تغرس ف الفجر جمرة
تلالي ف السواكن
ف ترعيدة الوترة..
گلت نكون انا
و شكووون انا ؟؟
هضرة…
ما تطاوع جوفها
ما تقهر خوفها
ما تشوف نعتها
ف تسرسيب العوام
ما تقلب عل الصح
ف حلاوة الكلام
او على معنى يتخايل
ف جلايل سطر مكنووون..
و گلت نكون….
گلت نكون
كلمة
تعاند مجابد التيهان
نسمة
تفاگد مراگد الريحان
ك الما
يتبارگ ف عيون العطشان
گلت نكون
جفلة
ف جرية غزال تبان
غفلة
حسدنا عليها غلف الصبيان
دفلة
حر زينها يتربي الزمان
گلت نكون
حملة
ساگت المحبة ويدان
جملة
علات المروة مييزان
محلة
من فراح دحات فينا لحزان
گلت نكون
انتي و بنتي
كيف ديما كنتي
تبسيمة بحر
يعنگ جرافو
ف كل موتة
ينقش الملحة
ف الصخر
فاخر للجرحة
و وگيد كل صرخة مكبوتة
فيضت من الشوق عيون
و گلت نكون.
من ديوان : ليل و مقال
