- رمزي نايلي
سيدي الرايس
المرض مازالو بصحتو فيك.
يبري في القلم تاعو
و يكتب بيك
غلطة كحلة في حياتي.
جابوك؟
ولا جيت؟
كنت طفل بداني الشيب قبل
ما تسخن كرسيك
واش بينكم و بين البلاد ؟
ارضها حاملة ترابها
على وجه الزرزور اللي ما بقاتلوش قسمة
من حصيدة الفلاح.
واش بينكم و بين التاريخ؟
الزمان راس كبير
و انتم زالقين فوق صلعتو
كي حبة مطر
تتهرب من عطش الدنيا.
أنت شاهد
بلي غسلنا كيسان سهرتكم
بدم الذراري
و بخينا بيه طحطاحتكم باش تشطح فيه الفضيحة .
تقول بلي راك مجاهد؟
أنا واش راك تشوف فيا؟
بلا شهيد.. ما نقبل حتى صفة.
قتلتنا يا سيدي الرايس
لا الماضي رخى روحو باش يفهمنا و نفهموه
لا الحاضر قدم لينا روحو كيما عابر سبيل ضيع خطواتو
و لا المستقبل فارح بخطواتنا ليه
حنا ثقبة
منها يدخل الشك لقلب العالم
سيدي الرايس
ما تهمنيش صحتك
ما تهمنيش حياتك
الشي اللي مخوفني انو يجي يوم
نحل فيه الباب و مانلقاش برة.
تعيش ولا تموت
كيفاش راح تشرح
لخويا اللي مات بالكونسار
بلي رجلو اللي تقطعت كانت عالة على الارض؟
و بلي مرضك يا سيدي الرايس مكتوبنا اللي لازم نآمنو بيه؟
يما قلبها سكت
بابا كيف كيف
و قلوبنا ساكتة ثاني
البركة في قلبك اللي بقا يدق
كل دقة رصاصة تقتل حلم طفل
و تجرح حمامة مرسومة على جدار المدرسة!
مرتي تقولي:
يا رمزي راك حاب ولادنا يزيدو هنا؟
نسكت كيما قحبة قبضت فوق حقها
و نحط عينيا ف لرض
على خاطر
مابقاتليش سماء
شكرا سيدي الرئيس
