المصطفى حماص

باش تْحب باش تتحب يا ملاك الحب

باش تقتل باش تموت يا ملاك الموت

بحال الحب بحال الموت

بجوج كَ يجيو على غفلة

بجوج ما كَ يْعلموش .

الموت باب مسدود

و الساروت عند ملاك الموت

الحب باب محلول

و الملايكة حارساه .

الحب شرع / الحب ملة / الحب دين

الحب زرعو الله في قلب النملة

قبل ما يخلق بونا آدم من طين

الحب باب ما يدخلوهش الشياطين .

العشق و الحب زريعة الرب

في قلب العبد

و حق الرب و تفتح قلبك

حتى تلقى فيه الورد .

عفاك بغيت وحدة

نقيها من الشوك

و لوحها في طريق خوك .

العمر ربيع خْضر

الروح كَ ترعى فيه

و النفس لاشْ تْليق

ايلى مازرعت المحبة

في كل طريق .

مادام الموت فيا يتسنى

خليني في طريق المحبة نفنى

خليني كالشمعة في الخلوة تذوب

نْصَفي دواخلي و نتطهر من الذنوب

نفنى آنا و تعيش المحبة

و يتّمحى ضوي في نور المحبوب

مبلي بالعشق و ما بغيت نتوب .

المحبة واد احلى من السُكَر

وانا البحر ما كْرَهت الزْيادة

كُب كُب خلّيني نَسْكر

ياك سكرة الحب حْتى هي عبادة …