عادل سليماني
ها عُودي ف القسمة
قالت نسمة للريح
ها حقي و ازيادة
قالت لحظة للتّـيه
أنا ف كلشي مْسـامح
قال اطويرِي و هو حاضن غمامة ب جَنحـيه
يمكن نتلاقى مع لغتي .. نْغربلْها
من لكلام والسكات
نْعنّـق روح الموسيقى
نْكــون قطرة
أو
نوطة ف الحقيقة
كِ امراية كتعاين لذة تسترها
يْلا الشك عرّاها
ما عمرني تغطيت ب الأوهام
يا لغتي
علاش كل ما شْويـتْ حِيرتي
كتْغمْـزِ فيا الطّوفان بلا ما تْرمشِ؟
علاش ريحتك كتحرشني
نقز عَل الحدود
و أولها حد ْ شوقي و حـَدْ احْدودي؟
علاش ف السفر كنلقاك خطواتي
وفيهم بجوج
توحيمة ف الغياب؟
علاش ف الشوفة اللْولى
ما ارحمتِ
ما ارجمتِ
الصدفة اللي عطشاتنا
وبلعتينا ب جغمة لقدار؟
يا لغتي
أجي انْضَيْعُو الوقت ف الحب
عاد انْضِيعو
بلا اندامة
نْقَشْرو لخْوا و نشوفو آش ورآه
نهمسو ب شْميعة ف وذينة الظلام
باش ننجاو
أجي انتحرقوا ب بوسة تفيَّق الزلزال
نحلبو الْفجر لينا و لأحلام الجيران
أجي نغرقو “اهنا”
ف نبضة قلب
كترجم راسها يلا شي لحظة اسهات عل ناسها
يا لغتي
طاوعيني عاد لَعنيني
إلى شفتيني عَل الحافة
دفعيني للهبال
وقولي فصيلة دمي الحب+
دفعيني بلا مْهل
راني غير حيوان منوي و تهموه ب العقل
