صباح بنداوود
حلمت الشتا
كتصب خمر
وريقي كيسيل عسل
شفت الورد نابت
ف كفوف الظلمة
وشفت قلبي مراح
لمقهور فيه يرتاح
والأرض جنة
كلشي ديالنا كاملين
عيني رموشها سبول…
تامر محبة ..
خدودي جنان ليمون
اللي جاعت شوفتو يتنزه
حروفي بحر بلاحراكة
أرض بلا دم
نظرة بلا هم
ليل بلا ظلام
شفت الحلمة حاملة بيا
وقبل ماتولدني
حلفتها تقمطني بالنور
تغسلني بالحرية
تلبسني أرض إلاهها
إنسانية مسبوغة بقوس قزح
خط معنق خوه
لون يكب ف خوه
واللوان كتزيد تنصاح ضو
شفت الريح سادة ودنيها
عيات من صوتها المجروح
عيات تغوت ف ودن الشر
عيات تنقي حلق لبحر
من سياسة ريحتها تعفنت
وباقة زايدة تجر صوتها
ف جوف الخابية
اللي قلبها عمر
فاض ف كاس المحنة
وخويتو ف كرش الحوت
على الله يتفكر
كاينة الحياة
وكاينة الموت
دمت متألقة ايتها المبدعه فخوره بك دائما تجملين الحرف بحرفيه ????