هاذ النص نحبّو
من
الجوع؟
انا دايما قسمة ناقصة.
لقمة صبحتْ.. زايدة
على تخمة الليل.
بصح
فرحان،
ديـــــــــــــــــــما فرحان
على خاطر
قدام كل شمعة
عندي ظلْ.
و ما يهمش إذا كانْ ظلي .
….
أنا كنتْ وَحْدَكْ
اضحكي على لغتي
بصح كي تجربي تكوني وحدي
ثم برك تفهميه … هذاك الحزن.
….
تتشاطح نارو ؟
وَلاّ حطبوُ اللي يطبل؟
يسقسيني جوعي
كل ما حطيت قدرة
على كانون “طافي”
….
كي ماتت يُمَّا
كرهتْ ربي
اللغة عصبتْ راسها
حرف حَبْ ينطق روحو
الأرض كي يحكها ظهرها
كفاش تتمرغ؟
كفاش القُنطة تصبَّرْ روحها
و تقول للحجرة ما تبكيش؟
كي ماتت يُمَّا
سمعت السكاتْ يهمسلي
بأسماء
و تفكرت قلبي.
….
أنا كل ما
حبيت نبني
نتأكد بلي لازم نضرب مسماري
في العود الراشي.
هذا واش علمتني القصيدة.
و ربحت فايدة كبيــــــرة من الخسارة.
….
قلتلها
ما لقيتش لغة قدك.
قالتلي
إسكتني بكل اللغات.
….
في كل مرة ما تفهمينيش
نحب نبوس ربك
و نحبك تغني لي.
…
قدرت على كلشي
بصح ما قدرتش نبكي بالفصحى.
