باش :
تكون قطرة والحياة منّك فايضة
تبقى السما ف العين صافْـية
تبقى نغمات الشوق عالـية
تبقى اشميعات القلب گادْيـة
يْـدوزْ اشعاك ف مقص الظلام ويقول عليه حافي
يبقى ظل الإيمان وافي
و يبقى التيساع ف الأمل.
…
باش
ما تْضِيعشْ شي لحظة ف الملامة
تّقطع الطريق على الخوف من الماجي
يْبان الَبعيد قريب..بلا ما تْـعكْلك ريح ..بلا ما طيح
ف السراب وتعكّـز على الرماد
…
باش
تعذر فلاّح انسى روحو ف عتلة
نجمة طاحت ف صلاة صغيرة
نسر ضحّى ب اجناحو باش تفقّص بيضة
شوفة تشققات و بدمعتها اطفات بركان
…
باش
البسمة ما تذبالش ب المرة
قبل و بعد لحصاد تسقيها..تحتار المناجل فيك
وفيها وما تْصوّر
غير الحب
و
الخير
تطل من ثقبة صغيرة ب قلب كبير على عالم واقف
ع الحافة
تعتق لي قدرتِ عليه..تشرب قهيوة مع وريدة دايرة
يقينها في اترابك..بلا ما تحزّر السكات الناشف ..
بلا ما تضطر تجبّر سؤال تهرّس على الشفايف
…
باش
تشرب كاس خاوي من لحلال ولحرام
تْولي العدو اللّول للشر..ترسم جسد بلا كبث
تغمز جذور الغابة..تكون صياد يخْصي الغدر ف
غريزة الذياب وتقدر تحافظ عل السلم
…
باش
تحييها وتحييك
تشوف الفرحة ف عيون الحجر يلا غرستِ شي
حاجة ..يبقى صدر الأرض دافي..
يبقى ضمير حربك صافي
تلقى اكتاف يسندك..
تذوب ف لون بلا ما لونك يفقدك
ينجح الناي ف درس الكمنجات
يكون الحق ف الخطأ كِ الحق ف الشمس
ب اللي عرفتِ واللي جهلتِ ما تحكمش على الناس
تكون الرحمة بارود مصقول ف المدافع
تنفض منك الطين وتسيح
بلا ما يسيل دم روحك من انياب الروتين
بلا ما يشبع الوقت منك ..ويتبعك.
بلا ما تندم القطرة التالية من حياة الحيرة ف حياتك
بلا ما تخطاك الحيلة
يخرج الفجر من خطواتك
وبلا سباب
تقدر تسامح
…
باش
تلقى كلمة تقولك
كلك وكلشي فيها يتقال
كلك و كلشي بيها يتقال
…
باش
تكون كِ النخلة الْيتيمة ” لرمال الصحرا مِّيمة”
تكون كِ الموجة اللي تتْهرّس على الصخر” حتى حاجة
ما تقدر تفرقها على البحر”
…
و باش
تكون انت هو انت. ] :
قــــــاوم
قاوم
ق
ا
و
م
