لمفضل الياموني
ـــــــــــ
ملي فتحت عيني ,ف الحال

لقيتني وحداني ..

غير أنا والسؤال ..نعاني..

مانعرف شحال هذي من عام
*
وباش نفكني ..

سخنت راسي …بلعاني

وشعلت لمعاني ف اللي كان وكان وكان ..

تبهولت ..

وف جوفي حرقت لكلام

حتى بانت قدامي طريق لحلام..

خرجت مني ومشيت ..قسوة ومحان

هرقت ..دفكت

عل لساني ..

سلت من ليام ..وتحطيت فوق راس القصيده عنوان

عتقتني من جبروت لمكان
وزرعتني ف جنان اللامكان

ف لهيه ..من لهيه
.فين كان ..
من المفروض يعيش الإنسان ….إنسانيته ..
بلاعذاب

لهيه من القسوة

لهيه من الحكرة ..بعيد عل الإغتصاب
لهيه من الديكتاتورية ..
بعيد عل ولاد الكلاب
لهيه من القمع ….
لهيه من الأرض …بعيد عل الذياب
فين كاين الكرامة …
فين كاين الخير مدفك ويدان

وتماك خلتني..
عايش
كاين مع الكاينين ف الدوام….

…