منصور لعميري
فات مني عمر
وباقي ف يدي شي ورقات
باقي مني ف قلبي صبر
تنغرق/تيطلعني
تنساني/ تيفكرني
تنتخيل بداية التكوين ف بار صغير
الساعة خطوات الله الغادية بيا
تك تك تتقرب
تك تك لهفة تتخليني مجمد ف اللحظة
إضاءة خافتة تتشهد من فوق راسي
من تحتي..
طابلة ف الزاوية المظلمة
كاس كاسي روحي من روحو
و كرسي خاوي مني
تنسكت/تنتكلم
تنوقف المشهد
الظلام ف الأصل الوان م خداتش حقها من الضو
كل واحد عندو حقو ف السكات
كل واحد عندو حقو يرجع سينة الحياة
تنقطع شي لقطات باش نعاود المونتاج
القدر ف كفي ظل ساكت
بوحدي
انا العابد
انا المعبود
انا الواحد المهمل
معاك
انا حبر سري فاضح سري
تتعجبني اللغة ملي تتخوني
تتعجبني الورقة ملي تشد حق البياض
خارج مني
انا سؤال قبل م يفيض مني الشك صمت
الخط الاخضر تيبقى عوج بحال ضلع الحياة
تيسالي كلشي مني
تيبدا كلشي بيا
واقف عليا
تنشوفني ملي تتموت فيا الحركة
تنبدل الدور مع صخرة
تنقص مني الكتلة / تنزيد فيا السرعة
وتنغوت من فوق الفوق
باقي فيا عمر
وباقي ف يدي شي ورقات
