حكيم شيخ/ الجزائر

قبْل ما نْبدا

حْسبت روحي بْنادم

كيما ڨاع الناس

يقْدر في كل وَقت

ياكل راسو الوسواس

و كِبْديت

طًلّتْ شمس حْنينة في سمايا

حَفْرتْ طريق السّاقية للشجرة

شَرْبت عْطَش الرمل ف الصّحرا

قبل ما نكمل

ولّيت ورقة صفرا

طايحة مَشْفَر لَخريفْ

نساتها الدنيا بين السما ولَرْض

تايْهة وحْزينة

مْجافية شْماخْ لَمطر

ناويه تغوي سْخانة الصّيف

حتى يبْست وتْفتت لْحَمها.

و كِكمّلت

سالت دموع غيمتي التّالية

شمْخت رماد الورقة

خرج من تحت جلدي ربيع

نْبت في صدري طريق للجنة.