يقدر …
انا كنت هنا
قبل ما يكونو
بني وطاس
يمكن شي مره
فوق الصفاحه
عجبني لجلاس
بين سكوت الليل
ونوار الدفلى
بايت عساس
حاضي زعطوط
لا ياكل التفاحه
ويسميها ف شي ناس
حتى لقيت القمره
طايحه
ف قاع الكاس
تفركل
و تفوح منها
ريحة البسباس
يقدر …
شي مره
خليت ملويه
بايته بلا نعاس
تراري بي
تغني لي
توشوش ف ودني
خبار لجبال لبعيده
وتخاف علي
لا نتقاس
يمكن كنت
.
وتبخرت من حر الشوق
وطلعت فوق لفوق
بلا قياس
حتى جات نفاسك
غربي
هزتني من قلبي
فوق سحابه
ساقتني للغابه
وطحت مع الشتا
رويت شحال من نبته
بكيت
بقيت ف قاع الكلته
و دار لي الما الطريق
ف الضيق
نزيت بين الطين ولحجر
و رجعت نسيل تاني
وهاني مداد ف قصيده
نتاوي الحرف ومعناه
باش العالم
يولي لاباس
يقدر …
ما شي انا
اللي حلى لك
كلام لوساده
حتى استحليت هاد العاده
و دخلك الوسواس
يمكن نكون
واحد اخر
لبسني
حرف مجنون
كتبني
جرح سخون
وخانه لكلام
بين جوج لسون
قر وفضح السر
باعني رخيص لدوك لعيون
خدا البوسه
منك عربون
ونستيه ف لخلاص
يقدر نكون
انا
قبل ما نتفرق على لفصول
ف سبع لوان
قبل من نولي مهبول
بضحكة الصبيان
وفاش عمر السبول
تفرشت النوادر
جاو الحصاده من كل مكان
غناني وبنادر
وبنات بلا مجدول
يتعابزو يتغامزو
عليك يا عروسة الفدان
معولين قبل ما تفيق
شمس الصمايم
رحبة لحروف
تبدا الدراس
تقي بي الى قلت ليك
انا ما شي من قريش
ما شي ما قاريش
من قديم خرجت سيبويه
من زجالي
خفت عليها تولي مبراصه
بعد حلاوتها
وعسل معانيها
ترجع تمساس
حفيض المتوني من كناش شي…
