حنان شاهين مصر
ما علمنيش يومها الغراب
اواري سوأتي عنكم
و ابان و كاني اشبهكم
مجرد شخص
بيشبه ضله في الشارع
و هل ممكن يثور الضل
او يرفض يكون تابع
لكنه للأسف سابني
و ما علمني غير انه
بسط جناحيه
و طار عكس اتجاه الريح
و سابني في توهة التاويل
انا و روحي
اوزعني علي كل الجهات حيرة و كومة اسئلة والعة
و اجمعني بدون اجابات
و انا شايلة خطاياي دما وردة
انا المسئولة عن موتها
يوم ما فضلت احرضها
تعدي السور
تحرر جذرها م الأرض
و توهب عطرها للريح
و تتحدى على ضعفها نخلة
انا اللي فضلت احرضها على الطيران
و ادندن لحن كان غناه
ولي من اولياء الله
حلت روحه بعد ما مات في قمرية
تملي تحط عالشباك
و تحكي لي عن المأساة
و كيف ظلموه
و كيف صلبوه لحد ما مات
عشان قال انه عدى السور
و راح يحكي مع العامة
عن الجنة و عن روح الإله لما تجلى له في شهقة ناي
و راح يعزف نعم حالم
عزفت معاه
بقيت في السمفونية نشاز
و في عرف القطيع شاردة
اقاموا الحد على روحي
و انا شاهدة
انا شاهدة على ضعفي
علي عجزي و انا وحدي
و انتو كتير
كتير جدا في نفس المنحدر ماشيين
بدون جدوى
يضيع بينكم صدى صوتي
كما نفخة في ناي مكسور
ما علمنيش يومها الغراب
انبش تراب الأرض
و ادفن روحي و أتأقلم
اعيش بلا روح
بتطرح كل حبة سؤال و تقلقكم
أذا مست قناعاتكم
بإن الارض مش كورة
او حاولت تعدل حاجة في الصورة اللي موشومة على جبينكم
في نعومة اظافركم
من اول حروف الجر
للألف اللي مكسورة
و للنون اللي محذوفة
بفعل الامر
انا مش حرف في كتابكم
انا كلمة علي السبورة بالطباشير
بتمحوها بحماقكتم فتجدد
لانها روح بترفض كل مرة تموت
و تستقوى بشعاع من نور
برغم انه هزيل بيفوت
يطمنها و يوصل رسايلها
ما علمنيش يومها الغراب
ازاي يكون لي جناح
اذا ضاق الطريق بيا
الاقي في سماي براح
لكنه للاسف سابني ما علمنيش غير انه بسط جناحيه وطارعكس اتجاه الريح
