عبير الديب سوريا
برد الوطن دافي
و إيديك بعدن شال ع كتافي
وعيونك بعتم الجفا قْناديل
بالحلم شفتك
كان حلمي طويل
و ما أقصر لحافي
بنطر ع شباك الصبر
وقزاز صبري بينكسر و بيجرح النطرة
وبخاف ع جسر المسافة من القهر
بين القهر والحب في شعرة
ومافي معي بهالليل إلا الوقت خمرة
وكاسات دمعي ال بشربن حسرات عالصافي
ع قد م سرقنا صور
رح ظل
أنسُل من حفاف الصور خيطان
تاخيط جروح الهجر
بس فل
واغفى ع شهوة ((نعمة النسيان))
وأصرخ ت ينزف ورد ..اسمك على شفافي
