ابراهيم زنيدر

غمــــــــــــزة الضــــــــو
قبل ما يرشكّ الضو نفطه ف الحلمه.
قبل ما تحبل الكلمه بشروق الخيال.
يحط اصبعُه ف راسي
يفيض بالمعنى كاسي
نقول لزماني ها انت شرب
فتحَت نجمه ليا دراعها..
طلّيت منها
قلت نجي غيث عل الورق
نغطس ف النّور ونصُبْ..
قبل ما يحسب التاريخ خسارته بالصبعان
يشوفو غمزة الضو العميان
يقولوا: باقي العقل عطشان.
كان خراب
كانت يد الخلق برّا عل الكتاب
كنت وحيد نطل عل الثقب
من ذك النجمه النّاقشة حروفي معاني
ذك النجمه الموقفاني سما
الواقفه هي رحم الحلمه
شفت وجهي ف الما
لقيت براتي عل الورق سماد
لقيت راسي ولد المداد…
قريت ف الشعا هروبي من الظلمه
سعفت راسي وحطيت شمعه ف الخوا
قلت ها عقلي ها تخمامي وما نوى.
ضربني سيف الضو
قبضت ف جلايلو نزاوكّ
وكلما رحلت سهوة ف التيه
ندخل سوق راسي..
واش انا الجاي من الضو
ولا ظلامي غارق فيه
كانت رحلتي عقبه
الظلام يحلف بالرقبه الظالم
ينتف لحيته زغبه بزغبه
يرعب بفتوته شحال من عالم
طليت
لقيت نجمتي موقفه العلم
حابله كرشها لفمها
لقيتني انا ف كرشها قلم
والد وولد صلبها..
نتخطّى عتبة الهبال
نخرج من بابو صحيح فصيح
توقّف نجمتي العلم
نطيرنسابق الرّيح
نسيح مداد
نتوضّا بناري
نكون مولود وميلاد
نتوجّع
نزحم
نحلم
نخلّي الحلمه تتزاد
نتولد فيها
نتجدّد
تتولد منّي
تتعدّد
نكون راسي بين يديها
نتوجّع
نزحم
نحلم
واللي لها لها..
ندور مع الكنّاش حرف
نزمّم
نكون جناح طير
نتعلّم
ننطّق جراحي
نخمّم..
نكتب راسي والنجمه بحر
نخرج من رمادي فنّيق حُرْ
أنا ف الحلمه غيمه
نتسنّى رعده تبرق
أنا ف الكلمه قيمه
ميزانها شعره وأرقْ
أنا غيث ف بوار الصّمت
خيال عاصي معناد
أنا ف الأصل ولد المداد..
ابراهيم ازنيدر