حكيم شيخ/ الجزائر
تْوَحَشْتك تحت ظل مكاش
لْبس الفْراغْ لُغتي و بْغا يَهْدَر
ما لْقَاشْ في فُمْ الكلْمَة حْروفي
تْوَحَشْتك
فوق غيمة هاربة مع نفاس الريح
بكات و ذابت جروح قلبي
هربت عيني م فراش السما
في باب العام
حشم التراب م ذنوب الخطوات
و سكت الكلام
توحشتك
و توحشتني فيك
حبيت كيما زمان نشوفني قمر في عينيك
نتلصص عليك من ثقبة في حيط الشوق
فيك الوحشة جمر يشطح بلهيبو
فرحان بالمطر
توحشتك طفل
نزاد اليوم يبكي ع البارح
يحبي فوق صدر يماه وما علابالوش وين رايح
توحشتك مني ليك
توحشتك و لبسني الهم في غفلة
طابت الدمعة في عيني وتفتحت وردة بلون الما
سكتت السما
بكى البحر
و خرج للرمل حافي
توحشتك
توحشتك بيني وبين روحي
نبتت القُنْطة مع جروحي
و قالت لليل روح
الصوت دفناتو الدمعة
و غْرَقت في سكاتي
أنا والحجرة الصَمّة زوج قلوب بردانة
أنا والشجرة العطشانة
روح سكرانة
طالعة الواد الواد
تحوّس ع العنصر
توحشتك
ولِّيت طفل صغير
تبسّمت بسْمة حنينة
مسْحتْ وجهي بيد الليل
تخطيت الساقية
شفت القصب
يرضع في حز ن المدينة
نزاد ناي في راسي
شربت الطريق نغمة حزينة.
