منصور لعميري
كنت كلمة
سبقاتني قبل م نبدا
و من بعد تعطلات
كنت خوا
قبل م يفكر الطين فيا
ونفكر فيه
نغربلو شواقنا بجوج ف ” كن ”
باش نكون
كنت ضلعة
تعوجات باش تشكلني
و من بعد تكادات
كنت هوا
رفعاتني روحي بشوية
وانا مرفوع بيه
كنت ذات
لعبت ف الشهوة
قربت ب خطوة ل خطوات
كذبت على الدمعة
زورت شوفة ب شوفات
وصلت قبل مني بغوتة
قبل مني بشهقة
رسمت ظل مزور الإحداثيات
كنت..
و كان كلشي باقي معطل
كانت الشمس ف حجر لبحر
ولمواج م زال تعاود ليه سبع حكايات
كان السكات رماد مجمر
يتسنى شي صوت يصوط فيه بشي غنيات
كانت النافذة عين الله
باش من بعد ” كن ” نشوفو فيا
