توحشتك
كلمة سايلة من ريق المعنى
كلمة عريانة من اللغة
توحشتك
كْلمة كتفيق فالوقت اللي ماتنويهش
وتفيّق لجسد اللي فالطين
توحشتك
كلمة مكتطفاش
مكتسالاش
توحشتك
كلمة مُطلَقة
مكتجزأش
توحشتك
كلمة
مَعْندهاش مع المنطق
توحشتك
كلمة
كَتْجي فمْرَّة
وتديك فمْرَّة
توحشتك
كلمة كتّنفس
كتشم
كتشوف
كتبوس
كتذوب
توحشتك
كلمة كتحيي
وكتقتل
يلا بقات مخنوقة فجوف السّْكاتْ
توحشتك
كلمة
كترسمك فمْرَاتي
وتمْحيني
توحشتك
كلمة
كَتْسيــــل مْويهة باااردة
على شقوق لعطش
فْ كْسدَة
تسناتك بزاف باش تولي جَسَدْ
وماجيتيش !
توحشتك
كلمة
كَتْنحت ظل
معنّق ظل
وتنفخ فيهم
جسد واحد.
توحشتك
جواب كافي لسؤال :
علاش أنا باقية هنا؟
توحشتك
ماشي غير كلمة
توحشتك
يد ممدودة ليد
ويد مشدودة بيد
توحشتك
المُحال لي بيناتهم
توحشتك
خطوة وحدة فزوج طرقان
دقة وحدة فزوج قلوب
نفخة وحدة فزوج ارواح
توحشتك
شجرة لوز نورات فخيال الشعر
توحشتك
قصيدة
تكتبات
غير باش نقولك:
توحشتك!
|
|
