شاهي يِحُطّوني فِ بَرْويطَةْ
وِيبيعوني للنْساءْ
بالِكْشِ تِتْعَدَّى ريتا
تِشْريني حتّى بِمْايَةْ
تَعْمِلْ بِدْموعي بَلّوطَةْ
وْشَرْكَةْ تهَبِّلْ كُلّ امْراةْ
وِبْدَمّي تحَمِّرْ الَحْويتَةْ
وِتْحَنّي وْتِسْمَعْ الِغْناءْ
وْتَرْبِطْ أعصابي قُرْبيطَةْ
وْتُخْرُجْ كِ حَمْراءْ حمراءْ
تَاخِذْ جِلْدي لِلْخَيَّاطَةْ
وْتِلْبِسْني وِالحالْ شْتاءْ
واللهْ نْدَفِّيها الياقوتَةْ
وْنرْضَى تْنَفَّخْني بِالماءْ
وْنَرْضى تْعَلَّقْني فِ شْريطَةْ
وِتْعرَّضْني لِلَّهْواءْ
وْنَرْضى تْحَدِّدْني يا ريتا
تِكْويني مَانْقولِشْ : لا
أَمَا تُظْلُمْني يا ريتا
كانْ تِسَلِّفْني لِ امْراةْ
شاهي تَزْرَعْني كِالنَّبْتةْ
وْتِسْقيني دمْعِةْ وَفاءْ
باشِ نْوَلّي كِالشَّعْباطةْ
وْنَطْلَعْ نَطْلَعْ لِلسّْماءْ
وْ كِ يُغْضُبْ رَبّي يا ريتا
نْقُلُّهْ : لا، ريتا لا
ضَحْكِةْ ريتا دواءْ للمُوتى
وْدايَ ما ليهوشِ دْواءْ
شاهي نِتْخَبَّى في ريتا
وْشاهي نَّوَّحْ كِ لِ امْراةْ
وْشاهي نَعْمِلْ عِيطَةْ وْ زيطَةْ
وْنِشْطَحْ حتّى نْوَلّي هْواءْ
