واش يْلِمَّك
يا نْدى
ضايع
فُوق الْما ؟!
واش يْلِمَّك يا ضْباب
في كَبْدْ السْما ؟!
واش يْفَسرك
يا صَوت الْعَڨُون
في حلْق النَّاي ؟!
واش يْلِمَّك يا بالي
وانت خايف من اللّي جَاي ؟!
واش يْلمَّك في تخْمِيمةْ شاعر ؟!!!!
واش يْرُد دمعة خاينة
لعْيون وْفية ؟!
واش يَحْرق الشُوق
في قلب صْبِية ؟!
واش يْنَشَف خْدود
طول العام مايهة نْدية ؟!
واش يمْحي لهْمُوم
في قلب واحد صابر ؟!!!!
ما يْهمْني نْيُوتن
أنا ناكُل التفاحة
انا جنتي لْ فُوق !
طْلعت للسْما
لْقيت راسي
ساكر من سْحابة !
زْرعت فيها طيني
لْقيتو عطشان من صيفو
اللّي فات
حبلت السْحَابة
ادَّات النملة حقها
وادَّات النحلة رْحَقها
وادَّات الفراشة ظلها
كل حاجة ادَّات قدها
وروحي ما لقات ندها
ناض اللّيل
طل الْمَعنى
فز الْقَلب
مدّيت الْيَد
مسِّيت الخوف
لْمَحت الصَد
شْرَبت مُر الهم
كاس بعد كاس
كل مانْقُول نلقى دروبي
خضرا
نْصيبها قفرا ويْبَ اس
وقتاش نْشُوف قبري
وقتاش نطلع لْ فُوق ؟!
عمار وليد حسان
