زجل..المصطفى حماص
ملي كنتوحش القصيدة
كَ نرجع ربعين عام من عمري
كنولي بْحال شي صابي حَل عَينيهْ في الدنيا
و كثر فيه التسوال
ـ فين كاين اللّه؟
ـ في قلوب المومنين
ـ فين كاين المومنين؟
ـ اللّه اللّي عارفهم
ـ شْنا هِيَ هادي ؟
ـ بَخوشَـة
ـ وْهادي ؟
ـ ببوشة
ك يْهزها بيدو و يبدا يغني :
يا البِّبيشَـة خَرْجي گْرَيْناتك و لا نقتل ليك وليداتك …
و سبحان الله كَتْخَرّجْ عْويناتها
====
ملّي كنتوحش القصيدة
كَ نرجع ربعين عام بالتْمام
كَ نْوَلي بْحال شي صابي رسام
كَ يْخَلَّط و يْجَـلّط في اللوان
كيرسم لوحة سريالية
و سبحان الله مايجي فين يدور العام ،
كَ تْوَلي واقعيَـة …
===
ملي كنتوحش القصيدة
كَ نْوَلي بحال شي فلاح في أرض بوُرِيَّــة
السما ما صابّاش و هُوَ مْوَحش تَمارَة
كَ يْوْعد المحراث
يقْلَب الارض عْلاها عْلى سْفاها
يْزُورَگْ زريعَـة حايْلَــة
و يرجع يَقْلب سْفاها عْلى علاها
و يبدا يْغني:
آ الشتا صبي صبي أ وْليداتك في قبي …
و سبحان الله كينوضو وليدتها
===
ملي كنتوحش القصيدة
كنهز عيني للسما
ويلى بانو سحابات
كنلبسهم حكايات من لحرير
بحال شي صابي فرحان بالعيد الصغير…
===
و ملي كتـوحشني القصيدة
كتجي في صِفةْ حلمة
وانا كنعطيها بالطوع
بحال شي هبيل و القلم عليه مرفوع ،
كتجي بحال دلو و موحش البير
وانا كنولي بحال شي نبي
ضحى بعمرو في العيد الكبير …