حنان شاهين

باليرينة بترقص فى مساحة متر × متر
محتاجة براح
علشان تنفض عن جناحيها الخوف
و تطير محتاجة ايقاع علشان ما تكمل رقصتها
و تحاكي الفلك الساير في دواير
و تكون فكرتها عن معنى الكون
عن حجم الدور المسند ليها
و ازاى الروح دبت فيها
برغم الموت المعلن من حواليها
باليرينة بترقص في تحدي
و مصرة تكمل رقصتها
و مفيش جمهور
و مفيش غير بس شعاع من نور
و موسيقى بتتردد جواها
ينخلق سرب من البجعات البيضا
معاها ترقص و تدور و يادوبك بس
تلامس وجه الارض بخفة
كأن قانون الجذب استسلم من فرط الرقة
ترقص و تدور
و تضم بخفة جناحيها
و تطلع من دانتيل احلامها
ورود و وزهور
تفتح برحابة كفيها
و ترش جهامة هذا العالم بالفراشات
تتحايل على ضيق المسافات
و علو السور بالرقص
فتحن عليها عيون الشمس
و تسرسب لها شعاع من نور
يبدأ وياها رقصة فالص
و ليلاتي تصحي الصوت الهامس جواها
و ليلاتي تعيد الكرة
و كأنها نجمة وحيدة في قلب مجرة
و كأنها نقطة ضي
في عتمة هذا الكون